Ginklaro ni Mayor McArthur Valdemar nga wala sang pinilian ang paghatag sang unit sa Housing Project sa Brgy. Pangabuan, Jamindan, Capiz.
Ini ang iya ginpahayag sang ma-interview sang Brigada News Fm Roxas.
Suno kay Valdemar, ang housing project sa nasambitan nga lugar ang na-award na sadtong tuig 2017, kun sa diin may yara ini sang 525 units kag 80% na diri ang mga pamilya nga naga-istar.
Ginpahayag sang alkalde, ang pag-identify sa mga beneficiary ang nag-agi gid sa criteria kag guidelines sang National Housing Authority (NHA).
Nahibaluan, ang amo nga pabahay ang isa ka Yolanda Rehabilitation Housing Project.
Lakip sa criteria ang mga masunod:
- Pamilya nga apektado sang bagyo Yolanda
- Head of the family
- Tumandok gid sang Jamindan kag
- Wala sang propedad nga ginapanag-iyahan
Dugang pa ni Valdemar, nga padayon ang ila pag-monitor sa mga unit kun may naga-istar diri ukon wala agud ila man mahatag sa mga pamilya nga deserving ukon qualified nga maka-avail sa nasambit nga proyekto.
Gintuad man sini nga may yara sang ongoing nga ginapatindog nga pabahay sa Brgy. Agambulong sa amo man nga banwa kag may yara ini sang 710 units kag 80% naman diri ang nahuman.
Masobra 700 diri ang nag-apply, gani ila pa ini nga i-validate agud matumod ang mga qualified.
Ginasiguro sang alkalde nga wala sang matabo nga “palakasan system” sa mga barangay kapitan agud maka-avail sang unit bangud nagaagi ini sa maidid nga proseso. | Judy Ann Juare
