Gibulabog sa magsoong Davao City Mayor Inday Sara ug Vice Mayor Sebastian Duterte ang katawhan sa syudad ug sa tibook nasud human sunod-sunod sila nga nagwithdraw sa ilang kandidatura isip reelectionist sa ilang mga kasamtangang posisyon karon.
Si VM Baste Duterte unang miwithdraw sa iyang vice-mayoralty bid ug gi-nominate si 1st district Councilor Jay Melchor Quitain Jr. nga mohulip sa pagdagan isip bise alkalde nga mihikay sab dayon sa iyang certificate of substitution.
Gisundan kini ni Mayor Inday dihang nagwithdaw usab sa iyang kandidatura ug gitudlo si VM nga maoy modagan pagka-alkalde nga gilayon sab mihikay sa iyang sertipikasyon pagka-hapon.
Nagtuo ang mga Dabawenyo nga molansad na si Mayor Inday sa national position pinaagi sa substitution apan dili pa klaro kung pagka-pangulo o ikaduhang pangulo ang daganan niini ilabi na nga wala pa kini mihatag og dugang detalye nunot sa pagwithdraw sa iyang local candidacy.
Ang withdrawal usab sa Mayor nagpalig-on pa sa pagduda nga posibleng magka-tandem sila ni kanhing Sen. Bongbong Marcos o siya ang mohulip nga standard-bearer sa PDP-Laban ug moatras si Sen. Ronald dela Rosa.
Apan kahinumduman nga pila ka higayon nang gibalibaran ni Mayor Inday ang hangyo nga modagan siya pagka-Pangulo apan sa naunang pahayag usab ni Vice Mayor Baste mabag-o lamang ang huna-huna o desisyon sa iyang magulang kung dunay mahitabo nga milagro.
Kahibaluan nga sa umaabot adlawng Lunes Nobyembre 15, 2021 ang katapusang adlaw sa substitution ang adlaw usab nga gihulat sa tanan kung unsa nga posisyon ang posibleng daganan sa alkalde.
