LEGAZPI CITY – Pig-decamp na kasuudma an mga bakwit kan Bulkan Mayon gikan sa duwang mga barangay sa Guinobatan, Albay na parehong nasa luwas kan 6 kilometers permanent danger zone.
An nasambitan na mga barangay iyo an Tandarora asin Muladbucad Grande.
Ini an kasuguan na pinaluwas ni Mayor Paul Garcia kasuudma makalihis na magkaigwa nin pag-orolay asin konsultasyon an opisina kaini kasabay an mga opisyales kan barangay asin an Albay Public Safety and Emergency Management Office (APSEMO).
Nasa labi 300 na mga pamilya gikan sa nasambit na mga barangay an pinauruli na sa saindang mga lugar, mantang labi 500 na mga pamilya man gikan sa Brgy. Maninila an presente pang nasa evacuation center.
Mientrastanto, pigsiyerto kan gobyerno-lokal na an mga pig-decamp na mga pamilya, igwang bitbit na mga ayuda gikan sa saindang opisina asin sa manlain-lain na donors.
