KABANKALAN CITY, Negros Occidental — Wala na suno sa mga militar may nabilin nga ‘mass base’ ukon ang mga komunidad nga gina-alegar naga-suporta sa New People’s Army (NPA) sa probinsya sang Negros Occidental.
Sa interview sang Brigada News FM-Kabankalan kay 3rd Infantry Division public information chief Lieutenant Colonel J-Jay Javines, ang mga nabilin nga mga NPA sa probinsya ang wala na may makunsiderar nga “influenced barangays” ukon mga lugar nga makunsiderar nila nga masa.
Suno pa kay Javines, ang NPA sa Negros yara nalang sa walo ang mga miyembro sini, kag “highly mobile” ukon naga lumpat-lumpat ini sang lugar, rason suno sa militar, nga nabudlayan sila nga mag monitor.
Sa piyak nga bahin, gina-kuntra man ini nga pahayag sang pulang hangaway, kag nagapanindugan nga may pwersa kag mabaskog pa ini nga nagapadayon sa ila armadong paghimakas sa isla sang Negros.*
