LEGAZPI CITY – Amay na nag-andam an Maritime Industry Authority (MARINA) Bicol para sa undas sa Nobyembre 1.
An totoo kaini, segun kay Regional Director Atty. Maximo Bañares, Jr., kaitong tulong semana antes an undas nagpuon na sindang makipagkoordinar sa mga ship owners para sa posibleng ruso kan mga pasahero.
Sinabi niya na nakipagtabangan na sinda orog na sa mga ship operators sa Matnog Port na siyertuhong magkaigwa nin naka- standby na mga barko nganing igwang mai-deploy en kaso mas magdakol an mga pasahero.
Hasta sa ngunyan, padagos an saindang pakikipagtabangan asin nasa 13 vessels an madalagan sa Matnog Port.
Pigsyerto man ni Bañares sa mga biyahero na bastante an mga vessel sa Matnog Port asin laoman an padagos nindang pakikipagkoordinasyon sa ship owners asin operators nganing tulos sindang makapag-deploy en kaso igwa pa nin kaipuhang vessel.
