Nagahurikap kadya kang maramig nga rehas si alyas Joque, 34 anyos, kasado, mangunguma, residente kang Brgy. Sinundulan, San Remigio, Antique, kag ginhingadlan nga No.3 Provincial level kag No.2 Municipal Level Most Wanted Person bangud sa kaso nga pagpanghimulus.
Dya ang naaresto kang San Remigio Municipal Police Station sa pagpanguna sa PCpt. Paul Joseph Oberio, Officer-In-Charge, kaimaw kang Provincial Intelligence Unit Antique, paagi sa Manhunt Charlie Operation nga ginhiwat kang Agosto 31, 2024, las-4:46 sa hapon, kag paagi man sa gahum kang mandamiento de arresto nga ginpanaog ni Hon. Jojo Cruz Cruzat sa diin dya ang wara kang may ginarekomenda nga piyansa.
Kaimaw man kang mga kapulisan sa pagserbe kang mandamiento de arresto ang presensya kang Brigada News FM San Jose Antique.
Ang persona ang magapabilin nga nakahunong sa karsel kang San Remigio MPS antes dya itugyan sa korte.
