Nag-angkon sang pilas sa natuo nga kamot kag likod ang isa ka mamumugon matapos maluthangan sang wala makilala nga suspek sa Brgy. Dayao, Roxas City.
Ginkilala ang biktima kay alyas “Dodoy”, 36-anyos kag residente man sang nasambit nga lugar. Sandig sa imbestigasyon sang Roxas City Police Station, nagsakay ang biktima sa tricycle ni alyas “Nonoy” kag nagsakay man ang wala makilala nga suspek. Samtang nagabiyahe ang tricycle, nagbaisay si alyas “Dodoy” kag ang suspek. Bangud nakita ni alyas “Nonoy” nga nagabot sang armas ang suspek nag-untat ini sa pagpamaneho kag dumalagan sa kahadlok nga maulamid.
Samtang nagadalagan si alyas “Nonoy” nabatian sini ang lupok sang armas-luthang kun sa diin gilayon ini nga nag-report sa kapulisan. Nagaguwa sa imbestigasyon nga may kaangtanan sa droga ang pagpangluthang sa biktima kag sa karon may person of interest na ang kapulisan sa may kahimuan sang krimen. | Judy Ann Juare
