Kaeabanan nga problema sa isla it Boracay hay ro mga hilong sa gabii kung siin dikara nagakatabo ro mga kinagamo.
Raya ro ginhayag ni PLTCOL Mar Joseph B Ravelo, Officer-In-Charge it Malay PNP.
Ginhambae pa nana nga kung may mga ginapatigayun nga parties sa isla, ginatutukan raya it andang patrol, agud mapunggan ro anumang kinagamo nga pwedeng matabo.
Kaangot sa manpower it Boracay police, ginpahayag ni PLTCOL Ravelo nga ro authorized personnel nanda hay 400 plus pero makarun hay kapin sa 288 eamang sanda, kaeakip eon kara ro shifting ag may mainland pa.
Pero ginbag o ni Ravelo ro deployment para masiguro nga tanan nga personnel ag mobility hay makapag function it mayad.
Samtang, sa nagtaliwan nga 3 buean it anang pag assume bilang OIC, hay owa sanda it nailistang insidente it pickpocketing.
Raya hay bangud sa mas ginpabaskug nanda nga police visibility sa isla it Boracay.
Kaangot sa uman nga pagbalik it mga parties sa isla, ginpasiguro ni PLTCOL Ravelo nga nakatutok sanda ag bisan imaw mismo hay gina-deploy nana ro anang kaugalingon agud masiguro nga owa it matabo nga kinagamo bangud suno sa hepe, “more approachable than ever” eon makarun ro Malay MPS. // ANN DESLENE SALAZAR
