Pilas sa ulo kag natuo nga abaga ang naangkon sang magulang matapos ginlabo sang iya manghud sa Brgy. Dacuton, Dumarao, Capiz takna alas 8:30 kagab-i sang Huwebes, Mayo 16.
Ginkilala ang biktima kay Aljer Denosta, 32-anyos, single, samtang ang ginatudlo suspek amo si Jemuel Denosta, 30-anyos, may live-in partner, lunsay mga mamumugon kag residente sang nasambit nga lugar.
Sandig sa imbestigasyon sang Dumarao Municipal Police Station, nagpauli ang biktima nga hubog kag nagtuga sang gamo sa ila puluy-an, ginsinumbag sini ang ila pertahan kag ding-ding tubtob nagpadulong ini sa balay sang iya manghud kun sa diin ginguba sini ang pertahan kag sa iya pagsulod gilayon ini nga ginlabo sang suspek rason nga nag-angkon sang kapilasan ang biktima.
Gindala sa Dao District Hospital ang biktima kag sa ulihi gin-transfer sa Roxas Memorial Provincial Hospital para sa nagakaigo nga pagbulong.
Wala naman na-recover ang patalom nga gingamit sa pagpanglabo. Sa karon, yara na sa kustodiya sang Dumarao MPS ang suspek para sa nagakaigo nga disposisyon. | Judy Ann Juare
