Padayon nga ginabulong sa Bailan District Hospital ang magulang matapos ginbuno sa tiyan sang iya manghud sa Brgy. Agkilo, Panitan, Capiz takna alas 10:00 kagab-i sang Huwebes, Hunyo 6.
Ginkilala ang biktima kay Robles Abalo, 46-anyos, single kag mangunguma. Samtang ang ginatudlo suspek amo si Michael Abalo, 34-anyos, single kag mamumugon, lunsay mga residente sang nasambit nga lugar.
Sandig sa imbestigasyon sang Panitan Municipal Police Station, ginapahayag nga nag-inom sang makahulubog nga ilimnon ang suspek kaupod ang isa pa niya ka magulang nga si Fernand Jun Abalo sa balay ni alas “Yan-yan.”
Pagpauli sang suspek sa ila puluy-an, ginkomprontar ini sang iya magulang nga si Robles kag didto na natabo ang pagbinaisay. Ginbuno sang suspek ang biktima sa tiyan gamit ang isa ka kutsilyo.
Gindala sang pamilya ang biktima sa ospital samtang ang suspek ang madasig nga nagpalagyo sa indi mahibaluan nga direksyon.
Sa karon, naga-conduct sang hot pursuit operation ang mga otoridad agud madakpan ang suspek.
