Arestado ang mag-live in partner matapos nadakpan sa akto nga nagabaligya sang indi lisenyado nga armas-luthang sa Urban Poor, Brgy. Milibili, Roxas City takna alas 4:45 kahapon sang Dominggo, Disyembre 17.
Ginkilala ang mga nagkaladakpan nga sanday Rogenel Arroyo, 26-anyos kag Carla Macalipay, 26-anyos lunsay mga residente sang Brgy. Sibaguan, Roxas City.
Sandig sa impormasyon nagikan sa Roxas Component City Police Station, nabaklan ang mag-asawa sang .38 caliber revolver nga wala sang serial number sa balor nga P2,100.
Narekober pagid sa paghinakop ni Arroyo ang isa ka sling bag nga naga-unod sang isa ka hand grenade samtang kay Macalipay nakuha sa sulod sang iya bag ang P2,100 nga ginbayad sa pagbakal sang armas; tatlo ka bala sang .38 caliber revolver; isa ka bala sang .357 caliber revolver kag isa ka bala sang .22 caliber.
Magapangatubang ang mga ini sang kaso nga paglapas sa Republic Act 10591 ukon Comprehensive Firearms and Ammunition Regulations Act kag dugang nga kaso para kay Arroyo nga paglapas sa Republic Act 9516 ukon Illegal Possession of explosives.
Sa karon, nagapabilin ang mga ini sa kustodiya sang Roxas City PNP para sa nagakaigo nga disposisyon. | Judy Ann Juare
