HUGOT nga gibawal ni Mayor Vic Paul Salarda sa Alabel, Sarangani, Province nga makasulod ang mga baboy ug pork products gikan sa ubang lugar, tungod sa hulga nga dala sa African Swine Fever kun ASF.
Nakigpulong na ang opisyal ngadto sa Provincial Veterinary Office ug gipatawag niya ang mga residente sa lugar nga adunay gibuhing baboy, dungan sa pagpahibalo nga likayan ang pagpalit og baboy gikan sa ubang lugar aron dili makasulod ang sakit nga ASF, kahibaloan nga ang Alabel ang border area sa Sarangani ug Gensan kung asa una nang nadiskobre ang maong sakit.
Gimando usab sa alkalde nga ang tanang baboy kinahanglang dal-on sa slaughter house ug didto kini ihawon, aron masusi ug masiguru nga ang mga ibaligya nga karne dili kontaminado sa African Swine fever. I Enamie Mogpon
