BICOL – NAGPAGIROMDOM an Land Transportation Franchising and Regulatory Board o LTFRB-Bicol katakod kan mga reglamentos na ipapasunod sa irarom kan mas hababang alert level pag-abot sa covid-19 status.
Ini matapos na iluwas kan ahensya an Memorandum Circular Number 2022-028 bilang bagong reglamentos na susunudon na angay sa kapasidad kan pasahero.
Segun sa Guidelines For Road-Based Transportation na base sa nasabing memorandum circular,gikan sa 70% tutugutan na an 100% full seating capacity sa NCR asin iba pang mga lugar na nasa Alert Level 1.
Mantang kun an byaheng intrazonal o interzonal an nasa pagultanan kan mga lugar na may magkaibang covid status, an seating capacity na susunudon iyo an ipapautob sa lugar na igwang mas hababang alert level.
Apwera digdi , dai na kaipuhan an mga plastic barriers alagad mahigpit pa man giraray na ipapautob an tamang paggamit nin “well-fitted face masks” sa mga pasahero, driver, asin konduktor siring man an pagsunod sa IATF-EID asin DOH health protocols, kabale na an sanitary standards sa mga terminal base sa Republic Act No. 11311.
Magigiromdoman na solamenteng an ciudad nin Naga asin provincia nin Catanduanes pa sana an mga lugar sa rehiyon na naibaba na sa Alert Level 1 status mantang nagtitiner man na nasa Alert Level 2 an mga provincial kan Albay, Camarines Sur, Camarines Norte, Masbate asin Sorsogon.
