KABANKALAN CITY, Negros Occidental — Daw ma-sambil ang sungad sang linibo ka mga pumuluyo gikan sa Central padulong sa sur nga bahin ang Negros Occidental, matapos nag-anunsyar ang Negros Occidental Electric Cooperative sang dugang nga taas sa kuryente sa bulan sang Mayo, subong nga tuig.
Base sa press release sang NOCECO, nag taas sang P 3.3300 per kilowatt hour ang generation rate sang NOCECO para sa bulan sang Mayo bangud sang mataas nga presyo sang kuryente nga gina-baligya sang KEPCO Salcon Power Corporation, isa ka power supplier nga naka base sa Cebu.
Sa bulan sang Abril yara na sa P 14. 6309 pesos per kilowatt hour (lakip na ang tanan nga additional charges) ang gina-bayaran sang mga kunsomidor sa ila kuryente, kag ang dugang nga pagsaka, maga-dangat na sa P 17. 9609 pesos per kilowatt hour ang pagabaydan sang mga kunsomidor.
Sa piyak nga bahin, nag-pahayag sang sentimyento ang isa ka kunsomindor nga si Irene Viason, nahanungod sa gina-alegar kapaslawan sang NOCECO sa pag-pangita sang mas barato nga power supplier agud indi ma tam-an ang mga pumuluyo sa kamahal sang presyo sang kuryente.
Ang NOCECO ang ginabulubanta may yara sang masobra 100,000 ka mga kunsomidor nga naga-purogiot sa kamahal sang kuryente.*