Ayaw munang ipagpalagay ni House Speaker Martin Romualdez na tutol ang Senado sa isinusulong na amiyenda sa economic provisions ng 1987 Constitution sa ilalim ng liderato ni Senate President Chiz Escudero.
Sa panayam kay Romualdez sa Bagong Pilipinas Serbisyo Fair sa Tawi-Tawi, sinabi nitong inaasahan niyang magiging mabunga ang pulong nila ni Escudero.
Malinaw aniya ang posisyon ng Kamara na economic provisions lang ang babaguhin upang makatulong sa pag-unlad ng ekonomiya.
Aalamin umano niya ang direksyon ng Mataas na Kapulungan sa constitutional amendments matapos ang pulong.
Kasabay nito, binigyang-diin ng House Speaker ang kahalagahan ng pagpasa sa mga panukalang batas na inilatag ng Legislative-Executive Development Advisory Council o LEDAC at ang mga inilahad ni Pangulong Bongbong Marcos sa State of the Nation Address o SONA.
Umaasa si Romualdez na kasama na ito sa mga prayoridad ng bagong liderato sa Senado pati na ang local bills na naaprubahan na ng Kamara.
