LEGAZPI CITY – Nagsagibo ki libreng Medical asin Dental Check-up an lokal na gobyerno kan Daraga, Albay sa duwang barangay kaini ngunyan na semana. Enot na ginibo an libreng dental check-up sa Brgy. Mayon, kun sain nagin benepisyaryo an 10 kaakian edad dos anyos sundo kwatro anyos na tinawan ki fluoride application service.
Sa kaparehong aktibidad nagkaigwa man ki dental health education hale sa Municipal Health Office na pig-atendiran kan mga magurang na tuyong magtao nin tamang kaaraman pag-abot sa pag-ataman kan ngipon kan saindang mga aki nganing maibitaran an mga impeksyon.
Mientrastanto, libreng medical asin dental check-up man an ikinondusir sa Brgy. Cullat asin nagkapirang pa sa mga serbisyo iyo an libreng eye check-up, libreng reading glasses, orange card profiling, libreng legal na konsultasyon, senior citizen PVC ID printing asin mga training na obhetong mairani na mismo sa kada komunidad nganing dae na an mga residente mapagalan na magpasiring pa sa munisipyo.
