PAKYAS ang mga LGUs sa Socsksargen region makab-ot ang punting nga mga indibidwal nga mabakunahan batok Covid-19 matag adlaw. Matud ni Dr. Edver Jane Montañer, Department of Health (DOH) 12 immunization manager naa sa 3,490,115 ang target sa rehiyon nga bakunahan o 70% sa adult population.
Asa kinahanglang mabakunahan sa mga LGUs ang 33,752 katao matag adlaw sa tibuok rehiyon. Sama sa GenSan, gikan sa 459,732 target population angayang mabakunahan ang naa sa 4,449 katao matag adlaw.
Ang Sarangani sa 413,522 target population kinahanglang makabakuna og naa sa 3,999 gikan sa priority group ug general population. Apan nakitang rason sa DOH-12 sa pakyas nga pagkab-ot sa daily average jab mao ang pagduha-duha sa kadaghanan partikular senior citizens.
Gipanawagan usab ni Dr. Montañer sa LGUs ang pagdugang na og mass vaccination site tumong mapataas ang vaccination rate. Giklaro usab sa opisyal nga daghan og supply sa nagkadaiyang brand sa bakuna ang rehiyon. Naa na sa Soccsksargen, ang Pfizer, Moderna, Sputnik V, Moderna, Sinovac, Janssen ug AstraZeneca vaccine. ( Richel Gubalani)
