KALIBO, AKLAN—Ginpueong ni Mayor Emerson Lachica do 16 nga Punong Barangay sa banwa it Kalibo agud nga istoryahan do mga pagahimuon nga tikang bangud sa padayon nga pagsaka it kaso it coronavirus disease 2019 (COVID-19) sa kabisera it Aklan.
Sa nasambit nga pueong, ginkasugtanan nga kinahangean nga mas pang striktuhan do pagpatuman it minimum health protocols sa tagsa ka mga kabaranggayan, pabaskugon do contact tracing ag limitahan do pagpatigayon it mass gatherings kapareho it birthday, bunyag, kasae, fiesta, namatyan ag iba pa.
Nasayuran nga do banwa it Kalibo do may una nga pinakamaabo nga nailistang kaso it COVID-19 sa probinsya kung siin may una pa raya sa makarun nga 44 aktibong kaso. // SHERRY ANNE REUNIR-VIDAL
