LEGAZPI CITY – Nagpaluwas na nin opisyal na pahayag an Legazpi PNP dapit sa nangyaring pagsulo sa mga heavy equipment na piggagaramit sa pagkonstruhir nin mga tinampo sa Sitio Anonang, Brgy. Homapon kan nasambit na syudad na kagibo su boot kan nagkapirang armadong grupo.
Sa pahayag kan hepatura sa pamayo ni OIC PLt. Col. June Aian Rojas, saro na naman ini sa mga perwisyo kan nasambit na mga grupo nganing makapangikil sa mga proyekto kan gobyerno.
An sinagibong pagsulo kan mga ekipahe, saro sanang patotoo na habo ninda nin progreso asin nganing patubudon an publiko na pabaya an gobyerno asin mabusol an mga pansadiring inters kan mga ini.
Huli kaini, an mga personahes kan hepatura, nagpapadagos aa pag-iimbestigar sa insidente siring man sa pagguno ki mga impormasyon asin mga ebidensya nganing maidentipikar an mga responsable digdi nganing pormal na masangatan nin maninigong kaso.
