MALAMPUSON ang launching sa Dr. Jorge P. Royeca City Hospital kun DJPRCH sa ilang 2D echocardiography, digital mammography, ug histopathology kun tissue biopsy facilities lakip na sa bag-ong supply room, computed tomography SCAN ug expansion sa ilang hemodialysis unit, adlawng Miyerkules.
Girepresentahan ni Kagawad Richard Atendido si Mayor Lorelie Pacquiao asa gipasalig sa department head ug staff sa city hospital ang padayung suporta sa mga aktibidad ug programa sa tambalanan isip usa sa top priority aron makahatag og maayong serbisyo sa katawhan.
Butyag usab ni Chief of Hospital Dr. Ryan Oscar Aplicador ang launching ug blessing sa nahisgutang mga pasilidad nagtumong nga makunhuran ang trabaho sa mga hospital staff ug malikayan ang pagpabalhin sa mga pasyente gikan sa DJPRCH ngadto sa ubang tambalanan tungod sa kakulang sa mga programa ug facilities.
Dugang pa ni Dr. Aplicador nga ginalantaw na sa ospital ang mas paspas ug mas efficient nga pagproseso sa mga medical needs sa mga pasyente.
Anaa usab sa blessing sa bag-ong pasilidad si Provincial DOH Officer Dr. Shahrir Duldoco ug mga heads and staff sa city hospital ug DJPRCH Chief Administrative Officer Karl Vincent Queipo.
