(UPDATE) SORSOGON CITY – Kinilala na ng Cawayan police ang lalaking pinagbabaril-patay, umaga noong Lunes, Hulyo 4 nitong taon sa Sto. Niño, Brgy Recodo sa bayan ng Cawayan, Masbate.
Sa pahayag sa Brigada News ng himpilan ng pulisya, ang biktima ay nakilalang si Jerome Masong Tudtud, 32-anyos, may kinakasama, magsasaka at construction worker na nakatira sa Purok 5, Brgy. Maihao ng nasabing bayan.
Ayon sa report, ang pamamaril ay naiulat sa himpilan ng Pulisya ng Punong Barangay na si Sanilito Andales.
Lumabas sa inisyal na imbestigasyon na ang biktima ay tinalian sa kamay, pinaluhod saka binaril ng nasa limang hindi kilalang mga suspek.
Nagpapatuloy pa sa ngayon ang isinasagawang imbestigasyon sa pagkakilanlan sa mga salarin at sa motibo sa krimen.#
