Patay ang isa ka lalaki matapos mabungguan sang salakyan samtang naga-jogging sa Brgy. Nasunugan, Dao, Capiz.
Ginkilala ang biktima kay Vincent Barona, residente sang nasambit nga lugar samtang ang ginatudlo suspek amo si Elizar Beltran, residente sang Brgy. Aglalana, Passi, Iloilo.
Sandig sa imbestigasyon sang Dao Municipal Police Station, samtang naga-jogging ang biktima sa kilid sang karsada takna alas 5:00 sang aga kahapon sang Dominggo hinali nalang ini nga ginbungguan sang Isuzu Dmax nga salakyan nga ginamaneho ni Beltran.
Nahibaluan nga nagikan sa probinsya sang Aklan si Beltran kag magapauli kuntani sa Passi.
Apang, pag-abot sa lugar nag-ovetake ini sa isa pa ka salakyan kag wala sini nadiparahan ang biktima nga yara naga-jogging sa kilid sang dalan.
Bangud sa impact sang pagkabunggo, nag-angkon sang patal nga pilas sa lawas ang biktima nga gintunaan sang iya kamatayon.
Ginpadangat pa ini sa Dao District Hospital apang gindeklarar sang doktor nga dead on arrival.
Ginkustodiya naman sang Dao PNP ang suspek lakip ang salakyan para sa nagakaigo nga disposisyon. | Judy Ann Juare
