Napasakaan na sang kaso nga Robbery kag paglapas sa Batas Pambansa No. 6 for Illegal possession of deadly weapon ang isa ka lalaki nga naaktuhan nga nagapangawat sang motor engine sang hand-tractor sa Brgy. Agbalo, Panay, Capiz.
Ginkilala ini kay Arnel Arguilles alyas “Orig”, 42-anyos kag residente sang Sitio Uyapad, Brgy. Binuntucan sa banwa sang Pontevedra.
Matandaan nga nadakpan ni PSSG Fredonan Batilaran, isa man ka katapo sang pulis sa nasambit nga banwa, nga ginapas-an na sang suspek ang motor engine sang iya ginapanag-iyahan nga hand-tractor ukon Bao-Bao.
Narekober sa paghinakop ni Arguilles ang isa ka unit sang motor engine nga nagabalor sang P20,000, motorsiklo kag isa ka backpack nga naga-unod sang 10 ka pulgada nga kutsilyo, tsenelas, kag t-shirt.
Sa karon, padayon sa gihapon ang pag-ayam sang mga kapulisan sa bayaw sang suspek nga ginkilala kay certain Allan Barredo alyas “Boy” nga iya kaupod sa pagpangawat apang wala nadakpan matapos nakapalagyo. | Judy Ann Juare
