Priso sa Pontevedra Municipal Police Station ang isa ka lalaki matapos nag-maoy kag may dala nga talibong sa tunga sang national highway sa Brgy. Malag-it, takna 7:53 kagab-i sang Lunes, Mayo 12.
Ginkilala ang nagmaoy kay alyas “Cris,” 29-anyos, single, mamumugon kag residente man sang nasambit nga lugar.
Sandig sa Pontevedra MPS, gilayon nila nga ginrespondehan ang report nga ila nabaton, pag-abot sa lugar ila nakita ang lalaki nga nagatuga sang gamo kun sa diin ila ini ginpalapitan agud pakalmahon, apang nagaretobar ini tubtob ginhaboy sang lalaki ang talibong nga iya ginakaptan sa naglabay nga motorsiklo.
Natigayon nga naaresto sang mga pulis ang lalaki kag ginkarga sa patrol. Sa karon, napasakaan na ini sang kaso nga Resistance and disobedience to a person in authority. | Judy Ann Juare