Nagawaras sa tunga sang karsada kag wala nagapamati sa iya pamilya ang isa ka lalaki nga ginapahayag nagasuprehir sang depresyon sa Pueblo de Panay, Brgy. Lawaan, Roxas City subong gid lamang nga aga.
Ginkilala ang lalaki kay alyas “Rap-rap”, 17-anyos kag residente sang Brgy. Sibuguan sining syudad.
Nagtuyo ini nga mag-utas sang kabuhi samtang yara sa karsada kun sa diin nagbitbit ini sang duha ka mga matalom nga kutsilyo. Makit-an sa FB live sang Brigada News FM ang iya mga ginahimo.
Natigayon ini nga madakpan sa bulig sang iya magulang nga amo ang nagpugong kag ginbululigan sang pila ka indibidwal, traffic enforcers kag mga pulis nga nagresponde tubtob nabuy-an sini ang duha ka kutsilyo.
Suno sa Iloy, na-depress si alyas “Rap-rap” sumugod sang nakita niya ang iya amay nga ginpatay sadtong 2018. Madamo naman nga beses nga nagtuyo mag-utas sang kabuhi ang iya bata.
Sa karon, yara na sa kustodiya sang Roxas City Police Station si Rap-rap para sa nagakaigo nga disposisyon.
