KASONG pagpatay ang ipasakang kaso batok sa duha ka lalaki nga suspek sa pagtigbas patay sa usa ka 32-anyos nga lalaki sa Sitio Budoy, Brgy. Guihing sa Hagonoy, Davao del Sur, alas 11:30 sa gabie sa milabayng Martes.
Ang duha ka mga suspek dali nga nadakpan sa mga sakop sa Hagonoy MPS ug gideretso paslak sa prisuhan giila nga sila si Erick Lindag ug usa ka Jovani Lindag, pulos hamtong nga nagpuyo sa maong lugar.
Una niini, napalgan na lamang sa mga istambay nag nagtuwad na nga nagkadugo ug dunay samad tinigbasan ang lawas sa biktima nga si Randy Limbong, 32-anyos, minyo nga residente sa maong lugar.
Giimbistigahan sa kapulisan kung unsay motibo sa krimen samtang ang patayng lawas sa biktima gihaya na sa usa ka punirarya sa Digos City.
