Dakop sang gintingub nga pwersa sang Pres. Roxas PNP kag Pilar PNP ang isa ka lalaki nga nagpangluthang sa Sito Bayes, Brgy. Poblacion, President Roxas, Capiz.
Ginkilala ang biktima kay Rosanito Dula Alba, 27-anyos, residente sang Sitio Lagubang sa nasambit nga barangay samtang ang suspek amo si Edgar Villa Dumali alyas “Barok”, 39-anyos residente naman sang Sitio Bato-bato, Brgy. Dulangan, sa banwa sang Pilar.
Sandig sa imbestigasyon sang Pres. Roxas Municipal Police Station, samtang nagalakat sa may bahin sang National Highway pauli sa ila puluy-an ang biktima, hinali nalang ini nga ginpalapitan sang suspek kag ginsumbag sang makapila ka beses.
Bangud sini, nagbalos ang biktima sang sumbag kag gilayon man nga gintambagan sang pila ka mga residente.
Sang nakapauli na si Alba, ginsundan ini ni Dumali kag may dala nga armas luthang.
Ginluthang sini ang biktima kag maswerte naman nga wala maigo sang bala.
Madasig naman nga nagpalagyo ang suspek kag natigayon nga madakpan sang kapulisan.
Daan nga hiligut-anon ang ginalantaw nga motibo sa amo nga insidente.
Sa karon, yara na ang suspek sa kustodiya sang mga kapulisan para sa nagakaigo nga disposisyon. | Judy Ann Juare
