LAING hinabang ang gihatod sa Brigada Group of Companies ug KaBrigada Foundation sa mga biktima sa sunog sa Purok Saeg, Barangay Calumpang nga temporaryong nagtinir sa usa ka tulunghaan sa Brgy. Calumpang, adlawng Dominggo, Nobyembre 7 sa buntag.
Ang mga hinabang naggikan sa mga nagkadaiyang katawhan sa managlahi nga sector nga nihatod sa ilang bugas, delata, noodles, saging, sanina, habol, juice ug aduna pay mga balde ug palangana, gi-impaki kini ug gikarga sa mga volunteers.
Sumala kay Philippine Airforce Reserve Sergeant Christian Jay Bentayo nga kuyog nya ang iyang mga kaubanan nga reserve ug may mga magtutungha sa ROTC nga nigahin sa ilang panahon ug kusog alang sa paghatud og hinabang.
Gidugang ni Bentayo nga nagapasalamat siya sa panawagan nga gihimo sa Brigada sa pagpanguna sa Ama ng Brigada nga si Brigada Elmer V. Catulpos sa pagtinabangay aron makatigum og dakung hinabang sa mga na biktima sa sunog.
Aron usab ipabatyag nga wala nag-inusara ang mga biktima sa ilang pagbangon gikan sa trahedya sa sunog nga naka-abo sa mga panimalay.
Usa sa nakadawat sa laing hinabang ang usa ka tigbasura nga si Jesus Nacua, sumala niini nga wala gayod siyay nasalba sa sunog hapit pa ma disgrasya ang iyang asawa kay natulog man atol sa sunog maayo nalang kay gipukaw sa iyang anak.
Wala daw siya sa ilang balay atol sa sunog kay didto siya sa Diamond Valley Tambler namasura mao nga gibiyaan nalang niya ang iyang mga dala sa dihang nakabati sa balita nga nasunog ang ilang kabalayan sa purok Saeg.
Tungod sa mga hinabang nagapasalamat kini kay wala daw sila pasagdahi sa mga tawong nagapakabana sa ilang kahimtang.
Sumala usab kay Cherry Ann Orlane, asawa sa usa ka mananagat, wala usab siyay nasalba sa sulod sa iyang tindahan nga inutang pa ang mga display, sa pipila ka adlaw nga naa sila sa evacuation area nagapasalamat sila sa Ginoo nga adunay mga tawo nga gigamit nga instrumento aron nga makadawat sila og hinabang bisan sa ginagmay lang kon matapok modaghan na. ( Ver Diazon)
