MAPASALAMATON ang laing 129 ka miyembro sa KaBrigadahan GenSan ang natabangan sa ilaha ra usab nga mga miyembro adlawng Sabado.
Sa programa nga gipangunahan ni Brigada Elmer V.Catulpos, kauban silang Dino Barrientos, Kagawad Mike Tanzo ug George Anas, gipasalamatan niini ang mga miyembro sa ilang walay puas nga pagtabang.
Dul-an P400,000 ang nakolekta nga bahinon sa mga miyembro alang sa ilang panginahanglanon sa pagpa-ospital ug uban pa.
Tulo sa 129 ang personal nga nagpasalamat sa mga miyembro nga mao si Melanie Aguas, 21-anyos taga prk.11-B, Brgy.Katangawan alang sa anak nga naospital. Lakip nagpasalamat si Fernando Alfonso Jr. taga Lajo Subd, Brgy. Mabuhay alang sa naospital nga asawa tungod sa sakit ug Charisse Mae Embong, 26-anyos-Prk.16, Promiseland 1, Mabuhay alang sa mentally ill nga igsuon.
Samtang nakatigom usab og sobra sa P25,000 alang sa anak ni Mellisa Aligo nga si Jomar nga 2-anyos ug adunay hydrocephalus. Misaad usab silang Kagawad Mike Tanzo ug George Anas nga tabangan si Mellisa mapabunyagan ang anak.
Alang kang Brigada Elmer nga balaan ang pagtabang ug kung tinud-anay, maka-attract kini og blessings hinungdan nga gusto nga ipakaylap sa tibuok nasud ang programang KaBrigadahan GenSan aron daghan ang matabangan.
