NAGAPASALAMAT sa Ginoo ang pangulo sa Public Transport Alliance of Gensan kon PTAG kalabot sa ika-25 ka tuig nga kasumaran sa Lagao Drivers and Operators Transport Cooperative kon LADOTRANSCO nga gisaulog adlaw nga Dominggo.
Sa paghinabi sa 89.5 Brigada News FM Gensan kay Robert Cang sumala niini nga nagsugod gayod sa tricycle ang ilang grupo unya nangandoy nga molambo ang ilang panginabuhi pinaagi sa transportasyon.
Sa panahon matud pa sa naunang mga opisyal gipautang sila og 20 ka multicab hangtud nga niabot sa duha ka gatos ang ihap sa ilang mga multicab nga nagbyahe sa Casa Luisa padulong sa Barangay Calumpang.
Hangtud niining panahona nga naabtan sila sa pandemya, sa dihang nisulod sa modern transportation, apektado kayo sila apan aduna usab nadawat nga mga ayuda gikan sa mga ahensya sa gobyerno.
Gidugang ni Cang nga sa ilang General Assembly nga gipahigayon sa usa ka Convention Center sa Gensan Pebrero 20, 2022 ilang na-aprubahan nga pwede na mangutang sa ilang coop ang ilang mga miyembro, na- aprubahan usab nila nga mahimo na sila nga multipurpose cooperative, ilaha pa aplayan sa Cooperative Development Authority kon CDA.
Sa karon ang ilang mga empleyado anaa na sa kapin 100 unya anaa na lang sa 60 ka unit sa multicab ang nagadagan gumikan nasagulan na kini sa E-jeep ug Euro 4, ang mga rota nga na-award kanila sa LTFRB ang Route 10 sa Doña Soledad, Route 11 sa Calumpang ug Lagao unya ang laing rota gikan Fatima padulong sa Barangay San Jose. I Ver Diazon
