LEGAZPI CITY – Isinairarom an nasa 66 na child development workers sa National Early Learning Curriculum Training kan Municipal Social Welfare and Development Office sa Daraga, Albay.
Ikinondusir ini sa Budiao Covered Court na may obhetong mapreparar an mga paratukdo sa burukasan kan klase na iyo an mapuon na ngunyan na aldaw kun sain kaiba sa natukar digdi an manungod sa paggibo nin curriculum o session plan na para sa mga kaakian edad tres asin kwatro anyos.
Nagkapira pa sa mga pinag-orolayan an Developmentally Appropriate Practice, learning resources packages national learning framework, pagkrear ki profile kan mga kaakian asin Early Childhood Care and Development checklist.
Mientrastanto, nagheras man kan saindang mensahe sa naunambitang aktibidad sinda DSWD Bicol ECCD focal person Shirley Ochoa, LGU Daraga CDW trainer Benilda Alamares asin iba pa.
