DUNGAN sa pagsaka sa ihap sa krimen sa GenSan, nagpagula og bahad batok kriminal ang labaw sa kapulisan sa siyudad. Bahad ni Police Col. Nicomedes Olaivar Jr., director sa General Santos City Police Office (GSCPO) walay lugar sa siyudad ang kriminal.
Sama sa nahitabong pagkamatay sa pipila ka personalidad nga gitudlong lambigit sa krimen, gidakop apan misukol nga miresulta sa pagkamatay nila.
Gawas niini, gisiguro ni Olaivar Jr., nga wala natulog ang GSCPO sa mga nahitabo ug padayon ang hugot nga pagbantay sa seguridad.
Sa datus, gikan Enero 01 hangtud Hunyo 30 ning tuiga nakatala ang GSCPO og 1,379 ka krimen tandi sa 1,295 atong 2023 sa susamang panahon. Sa maong datus, migula nga naa sa 84 ka krimen ang gisaka karong tuiga tandi nakalabay’ng tuig.
Usa sa misaka nga klase sa krimen mao ang murder nga gikan sa 20 atong 2023 nakatala ang GSCPO karon og 28.
Taas usab ang kaso sa kawat nga gikan sa 51 nakalabay’ng tuig nakatala na ang GSCPO karong tuiga og 63.
Apan miubos ang kaso sa lugos ug karong tuiga tulo ka carnapping incident ang narekord sa GSCPO. I Richel Gubalani
