READY na sa opening sa klase ang Labangal National High School alang sa mga estudyante karong Agosto 22.
Segun ni Dr. Maria Teresa Dinero, principal 2 sa maong tulunghaan nga anaa pa sa 81 percent ang ihap sa enrollees gikan sa 3,268 nga enrollees miaging tuig, wala pa naapil ang datihan nga estudyante nga apilon pa nila sa paglista.
Gibutyag usab ni Dinero nga limitado pa gihapon sa blended ug face to face ang ilang klase ug naa silang gimugna nga pamaagi aron ma-accommodate ang tanang estudyante tungod sa kakulang sa classroom ug magtutudlo.
Sa assessment niini, mas daghang ginikanan ang gusto na nga face to face ang klase ug kadtong dili pa andam, mao na lang alang sa blended learning.
Sa karon namatikdan usab sa nahisgutang principal nga sukad mianindot ang ilang tulunghaan, midaghan ang mibalik sa pagpa-enroll.
Nagpasalamat usab kini sa tabang sa mga alumni, kang Mayor Lorelie Pacquiao nga alma mater ang Labangal National High School,
nagkadaiyang sector ug ahensya sa gobyerno sa kalampusan sa Brigada Eskwela, hinungdan nga karon pa lang, ready for occupancy na ang tulunghaan.
