Kaso ang naghulat sa 14 ka mga individual nga gilangkuban sa tag-iya, mga empleyado ug parokyano nga nadakpan human gironda sa mga sakop sa National Bureau of Investigation Southeastern Mindanao Regional Office (NBI-SEMRO) ang Cleshan KTV and Resto Bar nga anaa nahimutang sulod sa Blue Opera Building, Lanang ning siyudad sa Dabaw, pasado alas nuebe niadtong Biyernes sa gabii, Hulyo 16, 2021.
Gilusad ang ronda human sa walay puas nga surveillance sa mga operatiba sa NBI SEMRO, gamit ang usa ka undercover agent ug nakompirma ang padayon nga pag operate ang maong KTV Bar pinaagi sa pagpasulod ug mga kustomer, pag pa-inum ingon man ang pag tanyag ug lawasnong kalipay ngadto sa mga kustomer bisan pa man sa gipatumam nga liquor ban ug curfew sa siyudad.
Dakpan sa maong entrapment operation sila Marajani Damiles Comamao, giingong tag-iya sa maong KTV Bar, Raquel Pepito Anante ug Catalina Palabrica Denaga – Barao.
Kalakip usab sa nadakpan mao sila Ruben Casico Cuizon, Larry Anthony Ecol Bohol, Jerick Basalo Damoso, Jonnel Toledo Bongas, Shigeo Kaneko, usa ka Japanese National, Joebane Adulfo Inhanbre, Jannette Baterzal Cortez, Angelie Laput Abellana, Jamaica Labasbas Castillo, Shermaine Labor Antonio ug usa ka Cho Deuk Yon, Korean National.
Sila Comamao, Amante ug Denaga-Barao ang gipasakaan ug kasong pagsupak sa R.A. 10364 o ang Anti Trafficking in Person Act of 2012 ug pagsupak usab sa Liquor Ban ingon man Curfew ilawom sa E.O. 30 series of 2021 nga adunay kalambigitan sa R.A. 11494 o ang Bayanihan to Recover as One Act. Samtang ang laing unse pa ka mga dinakpan, ang nag atubang karon ug kasong paglapas sa E.O. 30 series of 2021, an Order extending until July 31, 2021 the implementation of Liquor Ban ug Curfew sa siyudad.
Nakuha gikan kang Amante ug Comamao ang p3,500 nga marked money nga gigamit sa undercover agent nga nagtakuban isip kustomer sa maong KTV Bar nga maoy gibayad alang sa serbisyo sa usa ka babae nga nagtanyag ug lawasnong kalipay. Mismo si Amante sumala pa ang nidawat sa among kantidad nga nagsilbing sinyales sa mga awtoridad nga sudlon na ang maong KTV Bar.
Nasayran nga ang gihimong entrapment operation ang pinasubay kini sa mando ni Mayor Inday Sara Duterte Carpio. BNFM Davao
