Inabswelto na kaninang umaga ng Manila Regional Trial Court Branch 16 ang isinampang kasong illegal possession of firearms and explosives kay self-confessed drug dealer, Kerwin Espinosa.
Ito ay matapos ang kakulangan sa ebidensya ng prosekyusyon upang mapatunayang guilty si Espinosa sa paglabag sa RA 9516 at RA 10591.
Ayon sa Manila RTC, nagbase rin ang naging desisyon sa sinabing pahayag ng testigong si Marcelo Adorco.
Kung saan binigyang-diin nitong hindi si Kerwin ang nagmamay-ari ng mga baril kundi ang tatay nito.
Kung maalala, naging madugo ang naganap na pagre-raid sa compound ng pamilyang Espinosa sa Sitio Tinago, Barangay Binulho, Albuera, Leyte noong 2016 na kinamatay naman ng anim sa mga gwardiya ng mga ito.
Samantala, sa kabila ng kanyang pagka-abswelto ay hindi pa rin ito tuluyang makakalaya dahil sa apat na kaso pa nitong kinahaharap tungkol sa droga at money laundering.
