Nakasinati karon ug sagunson nga power interruption ang mga konsumidor sa Mactan Electric Company Inc. (MECO).
Maong gipasabot ni Engr. Gilbert Pagobo, ang general manager sa MECO, ang mga konsumidor nga tungod kini sa kataas sa demand apan dili mag-igo ang supply sa kuryente.
Ang line 1 ug line 2 sa National Grid Corporation Of The Philippines (NGCP) maoy main power source sa MECO.
Apan kasamtangan nga ang line 2 sa NGCP lang gikuhaan ug power supply sa MECO human nga nadaot ang line 1.
Gibutyag ni Engr. Pagobo nga ang line 2 maka supply lang ug 180 megawatt.
Apan sa maong nahabilin nga megawatt, nag connect pa niini ang Visayan Electric Company (VECO) maong 130 megawatt nalang ang matagana para sa MECO.
Apan matud sa general manager nga ang demand sa mga konsumidor niabot na sa 178 megawatt.
Tungod niini, aduna silay gi andam nga rotational power interruption schedules aron nga mag banos-banos ang mga lugar nga pagngon.
Apan maghuwat ra ang meco sa mando sa ngcp kung kanus-a kini ipatuman base ra usab sa alert status nga ilang ihatag.
Apan giklaro ni Engr. Pagobo nga temporaryo lang ang nasinating power interruption ug matud niya nga posible na kining mabalik sa normal sa karong semana. | Kristyl Joy Felerca
