SORSOGON CITY – Maipabatid at maikintal sa isipan ng mga kabataan na hindi solusyon ang pagpapatiwakal sa problema.
Ito ang pangunahing layon ng Kausap Program, hindi lang sa mga kabataan kundi sa lahat ng mga nakararanas ng depresyon.
Sa pahayag sa Brigada News FM-Sorsogon ni Joseph de Leon Advincula, isang mental health advocate at pangunahing may akda ng nasabing programa, sinabi nito na ang depresyon ay walang mukha, walang kinikilalang estado sa buhay at maaaring maranasan ng sinuman kung kaya napakahalaga umano na mayroong mga kahalintulad na programa na handang makinig at maaaring takbuhan ng sinuman na mga makararanas nito.
Dagdag pa nito, napakahalagang papel ang ginagampanan ng nasabing adbokasiya dahil ang simpleng pakikinig ay nagsisilbing paraan upang makapagligtas ng buhay.
Ayon pa kay Advincula, na batay sa datos ng Philippine Statistics Authority (PSA) nasa 17 milyong Pilipino ang nakararanas ng depresyon.
