Nakabalhag sang tatlo ka kaso sang Japanese Encephalitis ang probinsiya sang Capiz suno sa Provincial Health Office (PHO).
Ini ang ginpahayag ni Mr. Jeoffrey Espiritu, tagpamaba sang PHO sang ma-interview sang Brigada News FM Roxas City.
Suno kay Espiritu, ang Japanese Encephalitis, isa ka viral disease halin sa lamok nga infected sang nasambit nga virus nga gina-transmit sa tawo nga nagatuga sang brain infection ukon pagpalanghubag sang utok nga kun indi gilayon mabulong magaresulta sang kamatayon
Lakip sa mga sintomas sang amo nga balatian ang hilanat, sakit sang ulo, sakit sang tiyan, gapalanglapsi, nagasuka kag pagkakapoy.
Ginpahayag man ni Espiritu nga hilway na sa nasambit nga balatian ang tatlo ka mga persona nga naigo sang nasambit nga balatian.
Nagpanugyan man ini sa mga pumuluyo nga kun makabatyag na sang kalain sang pamatyag ukon nakaeksperensya sang hilanat gilayon na nga magpakonsulta sa pinakamalapit nga Rural Health Unit ukon hospital agud matumod kun ano nga balatian ang ginasupreher kag madapatan sang pagbulong. Ipabilin man nga malimpyo ang sulod kag palibot sang balay agud malikawan ang mga balatian. | Judy Ann Juare
