NAGPAGAWAS na og pamahayag ang labaw sa General Santos City Police Office (GSCPO) kalabut sa pagpatay sa kanhi opisyal sa barangay Fatima.
Human duha ka semana human nahitabo ang pagpatay kang Roger ‘Jing’ Jayoma sa Purok 20 sa maong barangay atong Hunyo 8 sa buntag.
Giangkon ni Police Col. Jomar Alexis Yap, director sa GSCPO nga daghang adlaw ang milutaw sa imbestigasyon sa kaso.
Hinungdan nga nalisoran ang mga sakop sa pag-imbestiga sa kaso ni Jayoma.
Hunyo 21, giaprubahan sa barangay council ang resolusyon nga nagpaapela kang Col. Yap nga paspasan ang imbestigasyon sa kaso.
Butyag ni Kapitan Renante Curit, buot nilang masayran ang tinuod nga motibo sa krimen aron maundang na ang espikulasyon sa hinungdan sa krimen.
Kahibaloan nga pipila sa anggulo nga gisundan sa kapulisan mao ang personal nga bangi, kalabut sa babaye ug yuta lakip sa pulitika. I Richel Gubalani
