Giharass pinaagi sa pagpabuto og armas alas-8:20 sa gabii, Hulyo 15 ang kapulisan nga anaa sa Community Police Assistance Center sa Barangay Suli, Kiamba, Sarangani Province sa wala mailhing mga armadong tawo.
Base sa report nga gipadala sa Kiamba Municipal Police Station, nakalatid nga gipabuthan sa wala mailhing armadong tawo ang lugar nga gikan sa usa ka coconut plantation atubangan sa CPAC.
Dugang sa report, gawas sa pagpabuto, duna usab nadunggan nga pagbusikad sa SOCOTECO II sub-station nga anaa sa kapin 500 ka metros gikan sa CPAC.
Gisuta usab dayon kini sa Sarangani Explosive and Ordnance Division (EOD) team. Wala matud pay gikatahong namatay o samdan sa panghitabo.
Sa karun, nagpahigayon na og pursuit operation ang kapulisan ug kasundalohan sa Kiamba aron sa pag-ila sa mga armadong nangharass sa nasangpit nga lugar.
Photo courtesy: Sarangani Police Provincial Office
