Hugot nagpahinumdum ang Davao City Police Office (DCPO) nga naka-full alert ang kapolisan ilabi na sa pagrekisa sa mga indibdiwal nga anaa gawas sa panimalay ilabi na karong anaa sa Modified Enhanced Community Quarantine (MECQ) ang syudad.
Sumala kang PCol. Kirby John Kraft, direktor sa DCPO, hugot ang pagrekisa sa mga pribadong sakyanan aron siguruhon nga walay sakay nga menor de edad ug mga tigulang nag-edad 65-anyos pataas nga lakip sa gidid-an makagawas karong panahona.
Alang sa mga empleyado usab pangitaan sa otoridad og mga ID o mga dokumento nga trabaho ang ilang tuyo sa paggawas o medikal nga rason ang ilang tinguha.
Sayod ang opisyal nga dili malikayan nga dunay mangilad nga indibdiwal nga mupalit kunuhay sa pagkaon ug tambal ilabi nang wala pa gibalik ang paggamit sa food and medicine pass (FM pass).
Nasayrang kagahapon gibutyag ni Davao City Mayor Sara Duterte-Carpio nga wala pa nahisgutan ang subling implementasyon sa FM pass. BNFM-Davao
