Moabot sa kapin P500,000.00 nga donasyon ang naipon sa 91.5 Brigada News Fm-Davao gikan sa mga suking tigpaminaw sukad gisugdan ang panawagan niadtong Disyembre 22 sa hapon hangtud Disyembre 26, 2021.
Ang maong mga donasyon gilangkuban sa salapi, sinakong bugas, delata, noodles, toiletries, hygiene ug sanitary items nga nakamugna og mokabat sa 2,500 food packs nga takdang ipang-apod-apod sa mga nabiktima sa bagyong Odette sa Dinagat Island ugmang adlawa Disyembre 28, 2021.
Sulod sa upat ka adlaw, moabot sa P346, 026.00 cash ang nalikom gikan sa mga indibidwal, grupo, organisasyon ug kumpanya nga wala nagmakuli sa paghatag sa ilang mga hinabang.
Target sa distribusyon ang anaa sa libuan ka mga residente nga nawad-an og panimalay ug panginabuhian ilabi nang hangtud karong mga panahona naglisod pa sila sa pagbangon.
Gawas sa mga food ug non-food items, duna sab bitbit nga mga magikero ug dulaan alang sa mga bata sa maong lugar aron mahatagan man lang og kalipay ug mapapas sa ilang huna-huna ang kalisud nga ilang nasaksihan nunot sa nihapak nga bagyo.
Sa ngalan sa tibook pwersa nga naglangkub sa kawsa sa pagtabang sa mga nagkinahanglan sa Dinagat Island, ang pamunuan sa Brigada News Fm-Davao kinasing-kasing nga nagpadangat sa pasalamat ngadto sa mga volunteers nga walay pagduha-duha sa paghatag sa ilang oras, kusog ingon man kagamitan.
Lakip usab sa gipasalamatan ang mga tigpaminaw, mga grupo, organisasyon ug mga kumpaya nga walay undang nga pagsupurta sa tanang kalihukan. BNFM-Davao
