Mukabat sa kapin 3 milyon pesos kantidad sa iligal nga droga ang nakompiska sa kapulisan gikan sa usa ka alyas Dodot sa gikasang drug buy bust operation sa mga personahe sa Maa Police Station.
Gipahigayon ang maong operasyon sa Purok 3 Sentro Brgy. Langub, ning dakbayan sa Davao diin naaktuhan si alyas Dodot nga namaligya og gituohang shabu ngadto sa nagpaka aron ingnon nga buyer bugti sa Php 10,000.00.
Apan sa dihang nakamatikod ang suspek nga pulis diay ang iyang gikatransiyon, mibunlot kini sa iyang armas ug nagpabuto tumong sa mga pulis ug isip depensa napugos ang otoridad sa pagbalos.
Gisulayan pa sa pagdala sa Southern Philippine Medical Center (SPMC) ang suspek apan gideklara kining dead on arrival (DOA) sa iyang attending physician nga si Dr. Alissa Gempata.
Narekober sa crime scene ang usa ka unit sa 38 revolver, basiyo sa bala ug tulo ka buhing bala, tulo ka buhing bala ug duha ka basiyo sa bala sa 9mm pistol.
Sa dihang paghiling sa patay’ng lawas sa suspek, nakuhaan kini og dakong pakete sa gituohang shabu nga gibana-banaan nga mutimbang sa 190 gramos nga dunay street market value nga Php 3,040,000.
