Migawas na ang resulta sa gihimong otopsiya sa patay’ng lawas sa dalaga nga taga-Davao nga nakaplagang patay sulod sa karton daplin sa kalsada sa Sitio Mohon, Barangay Tisa, Cebu City niadtong Hulyo 17, 2023.
Apan gumikan sa nagpadayon pa nga imbestigasyon sa maong kaso, wala pa kini gibutyag sa Cebu City Police Office (CCPO).
Sumala pa sa kapulisan sa Cebu nga semana human nga gipatay si Rhea Mae Tocmo, duna na silay persons of interest (POIs) apan dili pa nila kini mamahimong ibulgar sa publiko ang mga pangalan sa mga nahisgutan.
Kahinumdoman nga sa pakighinabi sa Brigada News FM-Davao sa kabanay sa biktima nga miadto sa Cebu ang dalaga aron nga manarbaho kauban ang iyang mga higala.
Apan mupauli na unta kini sa Panabo, gani nagpalukat na kini og ticket sa iyang magulang apan subo pamalangdungon nga nakaplagan na lamang kini nga brutal nga gipatay.
Hinoon, gipasalig sa Cebu Police nga dili sila muhunong sa ilang imbestigasyon aron nga makuha ang hustisya sa kamatayon sa dalaga.
