GIANGKON ni Kagawad Jose Edmar Yumang nga supak siya sa open pit mining ingon man ang konseho sa GenSan nga hugot usab gakontra sa maong pagmina.
Gituki sa konseho sa miaging adlaw ang may kalabutan sa open pit mining asa usa ka residente pinaagi ni Dr. Emily Lagare ang nag-awhag nga ubanan sa mga miyembro sa Sangguniang Panlungsod ang prayer rally sa Koronadal City karong adlawa.
Lakip sa pag-awhag niini ang pagduyog sa katawhan sa maong aktibidad aron nga awhagon ang gobernador sa South Cotabato nga i-veto ang amendments sa Environmental Code nga nagtugot sa open pit mining.
Alang kang Kagawad Yumang, kung tugutan sa iyang schedule, moadto kini sa Koronadal City aron muduyog sa prayer rally sa kapitolyo sa South Cotabato.
Kahibaluan nga usa ang SP-GenSan mipasa og resolusyon miaging regular session alang sa pagsupak sa open pit mining sa South Cotabato tungod usa ang syudad nga apil maapektohan sa maong operasyon.
