Ginhayag ni Vice Governor Atty. Reynaldo M. Quimpo nga ku Agosto 9 hay nakabatun ro SP Aklan halin sa Office it Provincial Governor it kopya it sueat nga may petsang August 9 halin sa opisina ni Congressman Teodorico Haresco Jr., kung siin, naka attach ro daywang kopya it withdrawal it House Bill No. 1085 nga pirmado it nasambit nga mga proponent nga may petsang Agosto 3 ag nabatun it House Committee on Rules ku Agosto 8, 2022.
Matapos nga mabatun ro kopya it letter of withdrawal, insigida nga naghiwat ro SP Aklan it special session ag inaprubahan ro SP Resolution No. 2022 067 Recalling and Rendering without further force and effect SP Resolution No. 2022-048 for being moot and academic.
Suno sa Bise Gobernador, raya eamang ro tama ag nagakadapat nga ubrahon sa idaeum it mga sirkumstansya.
Kaangot man sa ginasugid nga kawad-an it koordinasyon, diretsahan nga ginhambae ni Quimpo nga ro ‘coordination is a two-way street’.
Ro Aklan segun hay may una nga daywa ka representative sa House of Congress nga ro nagapangunang responsibilidad hay irepresenta ag i-promote ro interes it mga Aklanon.
Base sa records, ro HB 1085 hay na-file ku July 04, 2022 ag gin-refer sa Committee On Government Enterprises and Privatization ku July 27, 2022.
Pero haman owa segun na-impormahan ro Provincial Government it Aklan pinaagi it Office of the Provincial Governor o maging ro Sanggunian kaangot sa withdrawal it HB 1085 bago paman ro Agosto 8, 2022.
Owa eon segun kunta gin-isyu ag gin-aprubahan ro SP Resolution No. 2022-048 nga nagadeklarang Persona Non Grata sa probinsya it Aklan, ro tatlong kongresista halin sa CamSur ag Representative it Bicol Saro partylist.
Suno pa kay Quimpo, dapat ro main proponent it House Bill 1085, hay dapat nga sayud ag nagakadapat nga masayran ro angot sa eapnaag nga pagpamaeabag it mga pumueuyo sa Aklan sa Bida Bill ag dapat nga andang ginkonsidera ro kaparehong bagay bago nanda uman nga ire-file.
Ginpanindugan it bise gobernador nga ginhimo eang nanda ro nagakadapat base man sa impormasyon nga andang nabatun.
Sa ulihing parte it speech ni Vice Gov. Quimpo, ginhambae kara ro mga katagang “Isa lang dapat ang Boss natin, ito ay ang taumbayan o mga pumueuyong Aklanon”. / ANN DESLENE SALAZAR
