Inihayag ng Department of Health (DOH) na magmumula sa mga loans o pautang ang pondo para sa pambili ng mga bakuna kontra covid-19 para sa susunod na taon.
Sa briefing ng House Committee on Health, natanong ni Marikina Representative Stella Quimbo ang DOH kung bakit walang alokasyon sa pagbili ng mga covid-19 vaccine sa panukalang 2022 national budget.
Tugon ni Health Sec. Fransisco Duque III, may alokasyon naman sa ilalim ng unprogrammed funds o ang P45 billion na pambili ng covid-19 booster shot.
Ang inisyal aniya na hiling ng DOH ay P104 billion para sa booster shot, pero nakaltas aniya ng Department of Budget and Management (DBM).
Sa paliwanag naman Health Undersecretary Dr.Mario Villaverde, mayroong loans na kayang masakop ang suplay para sa first at second dose ng iba’t-ibang brand ng mga bakuna.
Dagdag ni Villaverde ang suplay ng mga bakuna kontra covid-19 ngayong taon ay mula naman sa foreign assistance project katulad ng World Bank at iba pa. //MHEL PACIA-TRINIDAD
