Ginaeauman nga sa buean it Abril hay posibleng magbalik eon ro international flight sa Kalibo International Airport (KIA).
Raya ro ginkumpirma sa Brigada News FM Kalibo ni Airport Manager Engineer Eusebio Monserate Jr.
Suno sa airport manager, umpisa nga ipaidaeum ro probinsya it Aklan sa alert level 1, nakitaan it pagtaas it numero it mga pasahero nga naga aeabutan sa KIA.
Sa kamatuoran, may daywa segun nga airline companies ro nagpaabot eon it proposal para sa additional flights.
Nakabatun man segun sanda it proposal halin sa sangka foreign airline company nga plano karang maibalik ro international flights sa KIA sa buean it Abril.
Ginpasiguro man ni Engr. Monserate nga ano mang development sa mga masunod nga adlaw, preparado segun ro KIA nga nagabatun it mga turista.
Samtang, padayun eon ro pag aeabutan it mga domestic tourist nga kaabuan hay nagabakasyun sa isla it Boracay. / ANN DESLENE SALAZAR
