Magpahigayon karong adlawa og indignation rally kalabotan sa pagpatay sa usa ka kanhing empleyado sa gobyerno sulod sa iyang panimalay sa Deca Homes Talomo ning syudad sa milabay’ng Biyernes.
Ang maong rally pangunahan sa mismong homeowners association sa nasangpit nga subdivision nga nagpadayag sab og kabalaka sa nahitabo ni Lillian Nieva, 51 anyos.
Nagtoo ang Davao City Police Office nga dako ang kasuko sa suspek ngadto sa biktima gumikan sa nahiaguman niini nga 44 ka mga samad dinunggaban ug posible sumala pa nga kaila ra sa biktima ang maong responsable.
Duna nay gunit nga person of interest ang kapulisan apan wala usa niini gikabutyag aron dili makumprosmiso ang nagpadayong imbistigasyon.
Una na nga nagmugna og Task Force Oplan Siyasat alang kang Nieva aron nga maoy musubay sa mga posibleng nagpaluyo sa pagpangawat ug pagpatay sa biktima.
Kahinumdumang napalgan na lamang sa iyang manghod nga lalaki nga nagbuy-od sa semento ang biktima nga nagkadugo ug wala nay kinabuhi.
Sa report nag-inusarang nagpuyo sa iyang balay ang Ginang nga gibisita sa iyang igsoon human nga wala kini nitubag sa mga tawag.
Lakip sa nahanaw nga butang sa biktima ang mahalong cellphone ug mga alahas.
Kasamtangan, nagpaabot na lamang sa mamahimong resulta sa gipahigayon nga otopsiya.
