Nakamatngon na matud pa ang mga inbound passenger sa Davao International Airport hinungdan nga niubos ang ihap sa mga pasaherong nadakpan nga nagpresenta og peke nga negative RT-PCR test result.
Kini ang gibutyag ni City Tourism Operations Office ug Airport Monitoring Team Head Generose Tecson human anaa na lamang sa tulo ngadto sa upat ang madakpan matag semana.
Giasoy sa opisyal nga sukad gibalik ang implementasyon niini sa milabayng bulan sa Marso karong tuiga, anaa na sa 82 ka pasahero nga nitugpa sa DIA ang nasikop ug kadaghanan kanila ang nakamulta ug napasakaan na og kaso.
Kung itandi matud pa sa mga unang bulan sa pagpatuman niini halos kada flight dunay pasahero nga nameke og RT-PCR apan sa milabayng mga semana anaa na lamang sa 3-4 pasahero ang masikop.
Nagtuo ang opisyal nga nagmatngon na ang kadaghanan air travel passenger sa striktong implementasyon niini sa Davao City gawas pa sa kahasol ug kaso nga atubangon kung masakpan.
Nasayrang usa sa hinungdan sa subling pagpatuman sa maong rekisitos aron masiguro nga walay dalang bag-ong variant sa COVID-19 ang mga inbound passenger sa DIA nga musulod sa syudad. BNFM-DAVAO
